Lampeskjermar - nytt prosjekt, DIY, whatever du vil kalle det :)

Eg kunne sjølvsagt ha laga ein kopi av den uberkule lampen øverst; til den nette pris av 3895,-  designet av Marc Eden Scholey for Ay Illuminate. Bildet huskar eg desverre ikkje kvar eg fann? Men eg synes den vart litt for rå etter stilen i huset pr.d.d. Difor vart det ein forenkla versjon. Såg ein liknande i ein butikk, men då hadde eg allereie kjøpt inn stoff og teikna lampen. For denne er designa av meg. Produsert av verdas flinkaste mannfolk på JancoMek på Gausneset, Ørskog. Eg trur dei bør droppe traktorhengarreparasjonar, bjelkekonstruksjonar og anna sveising, for lampeskjermskjeletta vart supre! Og rimelege. Eg har ein mistanke om at eg får ein spesiell timepris? Heilt ubetaleleg å ha slike folk i "teamet mitt", når det gjeld å få utløp for kreative idèar! Stoffet er frå ei lingardin, Åhlens. Pærehaldar med ledning frå Clas Ohlson. 

Og no er eg hekta... Må nok lage fleire lampar?

Desse to har kome opp over kjøkkenbordet, og er ikkje heilt ferdige enno.

Må tenkje litt før eg får til siste finishen. 

Og sjølvsagt kjem det fleire bilder ;)

NB! Viss du er plaga av pengar som brenn i lommene, og kjøpetrang, kan du stikke innom FB sida til Ølen møbler, for dei har lampen på det øverste bildet inne i butikken no!

Elin

Black & white

Skåler frå Herlighet

Black & White... 

Det regnar og er trist vèr hos meg, men vart i 

bedre humør av desse bilda ;) Putestabelen i

bakgrunnen lengtar etter å kome ut på terrassen! 

Det gjer eg også...

Elin

Draumesidene med i bok :)

Fekk ein fin mail på slutten av året i fjor, frå Franciska Munck-Johansen, om eg ville bli med på hennar nye bok, Sanselig Jul. Eg var faktisk i tvil med det same, for eg har aldri publisert bilda mine via andre. Og som den pessimisten eg har vore siste åra, var eg usikker på om eg hadde noko å bidra med? Men gode Franciska fekk meg til å senke skuldrane, og ho har gitt meg all tida eg har trengt til å få ferdig bilda mine. Det har ikkje vore så lett med denne ryggen, for eg har problemer med å sitje enno. Men i dag fekk eg sendt over dei siste. Tilfeldigvis på den dagen forfattaren har lagt ut liste over alle som skal delta. Eg kjenner meg glad og stolt over å få lov å vere med i dette selskapet av flinke bloggarar!

Eg vil takke for mogelegheita til å bli med i mi første bok!

Du kan gå inn HER viss du vil sjå den fullstendige lista over dei som er med.

Angåande innlegget frå før i dag, vil eg takke samtlege som tok seg tid til å gje meg tilbakemeldingar! Eg skal ta med meg alt i blogginga mi vidare! Fekk ein mail av ei dame som hadde trudd at det var eit bilde frå eit interiørblad eg viste i går, så ho gjekk ikkje inn av den grunn... He-he :) Ja, ja. 

Eg skal prøve å finne overskot og sjølvtillit til å vere tru mot den eg er, og stole på at det er godt nok. For det er nok det som er viktigast. Tross alt.

Elin

Eit uinteressant interiørbilde? Det er jo mitt?

Hadde ei litt merkeleg oppleving i går kveld, etter å ha lagt ut bilder frå mitt nye heimekontor. Halvert antal lesarar, og eg sitt igjen med ein følelse av at det er ikkje slikt eg kan vise på Draumesidene i framtida? I alle fall ikkje viss eg skal lytte til lesarane mine? 

Eg skulle ynskje at nokon la igjen kommentar i dag, med råd for kva blogglesarar anno mars 2012 har lyst til å sjå og lese om her inne på bloggen? Eg veit at halvparten av lesarane mine er innom uansett, men eg lurer veldig på kva den andre halvparten krev for å vere nysgjerrige nok til å stikke innom? Bilder frå kjøkkenet? Eg ser at dei innlegga har flest lesarar. 

No har det seg slik at eg bloggar jo om det eg vil og føler for,

men litt tips og råd skadar sjelden.

Og jada; eg veit at det er min blogg, der eg kan gjere kva eg vil.

Men som sagt; eg lyttar sjølvsagt til lesarane mine!

På førehand TAKK!

Elin

NB! Dette gjeld ikkje kommentarar! Eg viser til lesartala mine! Eg er meir enn fornøgd med alle flotte kommentarer!!!

(eg sjølv er ikkje i stand til å skrive hos andre, så då forventar eg ikkje at nokon skal gjere det her inne heller!)

Nokre bilder frå mitt nye kontorhjørne - My new home office

Nokre bilder frå eit halvferdig prosjekt...

Arbeidsbord med bukkar frå IKEA, rammer, liftgardin, pute på stolen og 

oppbevaringsboksar frå Åhlens. Bildet på veggen med naturmotiv, er ein koppehanduk frå Hviit. 

Det tek så smått form, kontorhjørnet mitt på stova. 

Arbeider stadig med å få rammene slik eg ynskjer, så får bilda kome på plass

inni dei etterpå ;) Berre eitt som er ferdig; med serviett frå TineK i kvitt og blått, Ølen møbler 

Hovedetasjen har ein del lyseblå detaljar, her er ikkje berre kvitt og svart. Synes dette er ein herleg farge no mot vår. Kjøkkenet er også omsnudd, vinteren er på hell, og eg har behov for å rydde bort nokre ting. Og så er eg nok blitt hekta på lampelaging, har eit nytt prosjekt på gang ;) Det kjem nok fleire bilder i løpet av neste veke.

Takk for alle fine kommentarar! 

Og spesiell takk til Eli for IPod i posten, 

eg var så heldig å vinne den inne på bloggen hennar! :) 

Elin

Endeleg kom TineK - pakken min :) Nytelse!

Fantastisk pakke i posten i dag frå Ølen Møbler! Og til alle som sikkert lengtar etter ein butikk med TineK på LAGER, kan dei gå inn HER på Facebooksida deira og lese meir, eller kose seg med den hyggjelege og flotte bloggen til Anita HER. Anita driv Ølen Møbler saman med mannen sin, og eg er rett og slett imponert over sørvis og hjelp! Dei har ikkje nettbutikk, men prøver å hjelpe kunder via postsendingar viss dei har kapasitet til det. Det bør også vere litt volum på det du ynskjer å kjøpe. 

Tusen takk til dei for å ha lyst opp kvardagen min!

Endeleg vart min heimelaga lampe fullstendig! Du kan sjå korleis eg laga

lampefoten HER. Lampeskjermane har vore ein draum sidan eg såg dei fyrste gongen, og det må vel vere nokre år sidan? Ellers har eg kjøpt meir keramikk, bl.a. dei kvite skålene med sølvkant. Det blir fleire bilder seinare av det eg pakka opp i dag :) Blei nesten julaften...

Eg gleder meg over at det er fredag og helg,

håper at helga også blir fin for alle der ute!

Elin

Kjøkken - Kitchen

Enkle, kvite gardinkapper, nye møblar på vei inn i rommet, kvite ranunklar på det gamle bordet... Grunn både til å kjenne vårstemning, og STOR forventning til investeringane eg har gjort i det siste. Kjenner at blodet pumpar litt fortare i årane av spenning :) Og det kan jo trengast etter dei siste månedane. Håper postpakkane mine er her SNART!

*

Eg har fått eit nytt favorittblad; KK Living. Har lest og bladd i det fleire gongar. Noko som eg ikkje får til med andre interiørmagasin for tida. Det er ikkje det at der var så mykje som akkurat er i mi interiørgate, men der var så mykje som fekk meg til å tenkje nytt. Vi var på besøk hos Irina i sommar, og ho meinar at eg treng meir fargar rundt meg. Det kan godt hende? Men til opplysning er jenterommet i huset i ferd med å få ein makeover, og der blir det nok ein del Irina-fargar ;) 

Sånn ellers har eg funne ut at mine "fargar" er nok musikken som alltid strøymer ut i dei romma eg oppheld meg i? Eg er avhengig. Må ha fin musikk når eg skal kose meg, slappe av, trene eller vere kreativ. 

*

Eg har kome i gang med ny behandling i dag, og etter kvart skal eg i gang med eit nytt treningsopplegg for ryggen min. Eg har klart meg uten krykker siste veka, og kjenner at det var mykje kjekkare å lage blogginnlegg i dag, med ein nakke som er veldig takknemleg for å sleppe belastninga ved krykkebruk. Kanskje innlegga blir litt hyppigare? 

Ha det fint!

Elin

Slettvoll vår 2012

Som den Slettvollelskaren eg er, er det alltid ei 

FRYD å få sjå nye kolleksjonar :)

For å sjå heile vårkatalogen, trykk HER!

Elin

Here I am - This is me, I think...

For det er vel meg? Kan bli litt forvirra, sidan eg er inne i eit stilskifte igjen. Men eg trur at min signatur er der uansett? Mange av tinga på bildet har eg jo hatt i fleire år :) Eg ser at det smyg seg inn draumar om meir asiatisk-inspirerte mønster. Trudde ikkje at eg skulle kome inn på den vegen. Men min veg blir til medan eg går, det er bra sikkert. Ein skal alltid vere åpen for nye tankar og idèar. Ny inspirasjon.

Det øverste bildet er mitt bidrag til NIB si mars-utfordring,

for fleire fine bidrag gå inn og sjå HER.

Tusen Tusen Takk for alle fine

tilbakemeldingar i veka som gjekk,

eg har verdens finaste lesarar! :)

Eg håper å klare å blogge litt meir i vekene som kjem,

det er ein siger for meg kvar gong eg postar

eit nytt innlegg!

Elin

Inspirasjon TineK

Herlege inspirasjonsbilder frå TineK
Og ja, det er lampeskjermar frå denne leverandøren eg ventar på,
i STOR spenning. Er likevel veldig glad for alle desse flotte
bilda ein kan nyte heilt GRATIS!




Elin

DIY lampefot, anbefalast! Make your own lamp!

Frykteleg lyst på ny lampefot, eller kanskje fleire? Det hadde eg også... 

Og draumen var denne :

TineK sin lekre, men akk så dyre variant...

Kva gjer ein då? Jau, då lagar ein seg ein fot som liknar vel? ;)

Fann desse lysestakane på Kremmerhuset for litt sidan, til under 200-lappen pr.stk. 

Hadde først tenkt å måle dei, men det blir ikkje noko av. 

Berre ELSKAR den sletne trefargen!

Etter litt shopping på Clas Ohlson, av ferdigpakke med ledning og pæresokkel,

måtte eg ha hjelp. Min SNILLE snikkarven Kristoffer klarte å borre eit 7mm hol ned gjennom

lysestakane. Eg hadde på førehand skrudd opp alle skøytar, og limt med kontaktlim, for å styrkje dei. For å gjere stakane litt høgre, sagde eg av to trebitar (av hesjestaur, men her kan ein bruke nesten kva som helst) og limte på toppen. Desse bora eg gjennom sjølv med same type bor. Deretter brukte eg verkty eg ikkje kan navnet på, og hola ut litt ekstra for å senke pæresokkelen ned i trebiten. Eg klipte av dei originale kontaktene, og tredde så ledninga ned gjennom alle delane, deretter limte eg fast trebiten og sokkelen med kontaktlim.

Det vanskelegaste var å få ledninga til på undersida. Eg bora inn i sida på staken nesten heilt nede, og halla på boret, slik at eg kom ut gjennom botnen på skrå. Så laga eg ein "gang" som ledninga kunne ligge oppi under staken. Sjå på bildet eg legg ved; dette vart litt vanskeleg å forklare. Men det gjekk alldeles strålande, er nesten overraska sjølv?

Har enno nokre utfordringar m.t.p. å få laga til fester til lampeskjermane som skal på, dei skal ikkje ned over pærene. Men det skal eg vel få til?

Så no ventar eg spent på ting eg har bestilt til huset. Bl.a. nye lampeskjermar. Eg tenkjer at eg har spart så mykje på lampeføtene, at eg kan ha litt dyrare skjermar? 

Eg er i alle fall veldig fornøgd med resultatet! :)

 Og du kan lage lampeføter av mykje rart? 

Kanskje du fekk ein idè? På Clas Ohlson har dei i alle fall alt du treng! 

Eg skulle gjerne hatt bilder av prosessen undervegs, men eg orka ikkje å ta bilder i tillegg til alt det andre eg måtte gjere... Skal heller passe på å gjere dette neste gong eg ordner nye lampar ;)

NB! Ein skal ha hjelp av elekriker for å koble kontakter på nytt... 

Inspirert?

Prøv, dette var eit av dei kjekkaste 

prosjekta eg har hatt på lenge!

Elin